Back to: خ سے شروع ہونے والی نعتیں
| خوشبو ہے دو عالم میں تیری اے گُلِ چیدہ کس منہ سے بیاں ہوں تیرے اوصافِ حمیدہ |
| سیرت ہےتیری جوہرِ آیئنہ تہذیب روشن تیرے جلووں سے جہانِ دل و دیدہ |
| تجھ سا کوئی آیا ہے نہ آئے گا جہاں میں دیتا ہے گواہی یہی عالم کا جریدہ |
| خیرات مجھے اپنی محبت کی عطا کر آیا ہوں تیرے در پہ بہ دامانِ دریدہ |
| ہے طالبِ الطاف میرا حالِ پریشاں محتاجِ توجہ ہے میرا رنگ ِ پریدہ |
| مضمر تیری تقلید میں ہے عالم کی بھلائی میرا یہی ایماں ہے ، یہی میرا عقیدہ |
| تُو روحِ زمن، رنگِ چمن، ابرِ بہاراں تُو حسنِ سُخن ، شانِ ادب، جانِ قصیدہ |
| اے رحمتِ عالم ﷺ تیری یادوں کی بدولت کس درجہ سکوں میں ہے میرا قلبِ تپیدہ |
| اے ہادی ِ بر حقﷺ تری ہر بات ہے سچی دیدہ سے بھی بڑھ کر ہے تیرے لب سے شنیدہ |
| یوں دور ہوں تائب میں حریمِ نبوی ﷺسے صحرا میں ہو جس طرح کوئی شاخِ بریدہ |
