Back to: ر سے شروع ہونے والی نعتیں
| راستے صاف بتاتے ہیں کہ آپﷺ آتے ہیں لوگ محفل کو سجاتے ہیں کہ آپﷺ آتے ہیں |
| اہلِ دل گیت یہ گاتے ہیں کہ آپﷺ آتے ہیں آنکھ رہ رہ کہ اُٹھاتے ہیں کہ آپﷺ آتے ہیں |
| کہکشاں ، رہگزر ، چاند ، ستارے ، ذرے سب چمک کر یہ دکھاتے ہیں کہ آپﷺ آتے ہیں |
| اپنے شاہکار پے خلاقِ دو عالم کو ہے ناز انبیاء جھومتے جاتے ہیں کہ آپﷺ آتے ہیں |
| اہلِ ایماں کے لبوں پر ہے درود اور سلام یومِ میلاد مناتے ہیں کہ آپﷺ آتے ہیں |
| دل کو جلووں کی طلب ، آنکھ کو طیبہ کی لگن دیکھیے مجھ کو بلاتے ہیں کہ آپﷺ آتے ہیں |
| اُنکی آمد کے پیامی ہیں صبا کے جھونکے پھول شاخوں کو ہلاتے ہیں کہ آپﷺ آتے ہیں |
| بول بالا ہوا حق کا تو بُتانِ باطل خانہِ کعبہ سے جاتے ہیں کہ آپﷺ آتے ہیں |
| رہگزر میں نظر آنے لگے ہر سو جلوے ذرے رہ رہ کے بتاتے کہ آپﷺ آتے ہیں |
| مرحبا صلی علٰی کی صدائیں ہیں لب پر لوگ صدقے ہوئے جاتے ہیں کہ آپﷺ آتے ہیں |
| اُنکے جلووں سے نکھرنے لگی دل کی رونق میری تقدیر جگاتے ہیں کہ آپﷺ آتے ہیں |
| چاند تاروں میں نصــیر آج بڑی ہلچل ہے یہی آثار بتاتے ہیں کہ آپﷺ آتے ہیں |
