سوشل میڈیا نا پہاڑی زبان اُپر اثر

Back to: Pahari Language And Literature

ابن خلدون نے آکھیاسی :
”انسانی تاریخ کے دھارے ایک تخلیقی رو میں مسلسل بہہ رہے ہیں اور یہ بڑھتے ہی چلے جائیں گے۔ نہ تو ان کا راستہ پہلے متعین ہے نہ ہی کہیں پر ٹھہرتے ہیں۔ نہ ہی ایک جگہ بھنور کی طرح چکر لگاتے ہیں ۔“
(اقبال کا نظریہ خودی صفحہ: 191)

اس قول نے حوالے نال کِسے جگہ زیادہ چِر توڑیں ٹھہرنا انسان نی فطرت نا خاصہ نیہ رہیا۔ تبدیلی نا تواتر، نویاں قدراں نا استقبال، پرانیاں سوچاں نا انتقال زندگی کو خوبصورت تہ بامعنی بنانے اُگر ہے۔ فطرت نے فیصلے نے مطابق سارا تخلیقی عمل رُکنے یا ستانے تک ہی محدود نیہہ بلکہ اپنی ساری توانائی اِسے گَل بچ ہے کہ اِتھے تبدیلی نا مزاج ہر ویلے تہ ہر حالت بچ اپنی دوڑ جاری رکھے۔

پشلیاں ست دہاکیاں بچ جس تیز رفتاری نال سائنس نی ترقی تہ کمپیوٹر نا راج اپنا سکہ جما گیا ہے، ایہہ کمال حد تک حیرت انگیز ہے۔ نویں نویں تجربات ہوئے۔ سوچاں بچ وی اک قسم نا انقلاب پیدا ہویا۔ فرسودہ خیالات بلیں بلیں اپنا بستر گول کر کے رخصت ہور ہے ہین۔ انہاں نی جگہ انسانی شعور نے لے کے دُنیا اُپر ثابت کر دِتا ہے کہ آج نا انسان حقیقتاں کی اُس نی ننگی حالت بچ تک کے اپنا نظریے تہ عقیدے نی تازگی حاصل کرنا ہے۔ کل تک جیۂڑی گل راز بنی ہوئی سی، اَج باندے باچھٹر نذر آ رہی ہے۔ نالے سب پڑھے لکھے یا ان پڑھاں نی یاداشت نا حصہ بن چکی ہے۔ آج نا انسان تۂرتی نے سارے ر از ممکنہ حد تک جاننے نا حصہ دار بن چکیا ہے۔ ہہن ایہہ تۂرتی توں آگے خلا بچ نویاں نویاں کالونیاں بنانے نے منصوبیاں نے بارے وچ سوچ رہیا ہے۔ زندگی نے ہر مدان بچ کھوج نا دفتر کھول دِتا ہے۔ ایٹم یا خلیہ (Cells) توں لے کے چَن تہ مریخ تک پُۂجنے تہ اسکی مسخر کرنے نے منصوبیاں اُپر کم کر رہیا ہے۔ ایۂجے سارے اسباب انسانی شعور اُپر اپنا قبضہ جما کے آگے آگے بڑھنے نے سلسلیاں نال جُڑ چکے ہین۔

اس گل بچ کوئی مضائقہ نیہہ کہ آنے آلے پنجاہ سالاں بچ دریافتاں نیاں ساریاں سرحداں عبور کر جانے کی راہ اُپر اَج انسان عمل پیرا ہے۔

انسانی سفر نا جدید دور اجاں پنجاہ سالاں نے آس پاس ہے۔ جدوں ریڈیونیاں نشریات شروع ہوئیاں اس نے اثر انداز ہونے نال مذہب ثقافت تہ تہذیبی اُٹھان تہ اُڑان نا سلسلہ شروع ہویا۔ انسان کی ریڈیو نی ایجاد توں جِتھے عالمی حالات تہ واقعات نی سُدھ بُدھ ہوئی اُتھے ہی فلماں نے اثرات تہ نویں سوچاں نے داخلے بھی شروع ہوئی گئے۔ پُرانی وضع قطع کی وی خاصہ متاثر کیتا۔ وہم پرستی نا جمود ٹُٹیا تہ سچائیاں اسنے جگہ اپنا ڈیرہ سٹیا۔ دل تہ دماغ اُپر بنایاں ہوئیاں شکلاں نے قلابے بدلے، نویں تہذیبی زندگی بچ بلوغت نے اثرات ملے۔

اسے نال ہی ٹیلی ویژن نی ایجاد نے انسان کی اور بچے کچھے جمود فدتوں باہر نی طرف آندا۔ مشاہدیاں نی دولت ہتھ آئی۔ رہن سہن نے طور طریقے بدلے۔ غذائی ضرورتاں بچ تبدیلیاں آئیاں۔ اس طراں انسان نیڑے توں فطرت نے نال چلنے سمجھنے تہ سوچنے اُپر مجبور ہویا۔

گَل اِتھے ہی بس نیہہ ہوئی۔ زبان و بیان اُپر بنی عمارت اک نتھری ہوئی سج دھج نال چمکی، سفری سہولتاں بچ نزدیکیاں نی وجہ توں اک دُوے نال افہام و تفہیم آلا ذہن پیدا ہویا۔ اسطراں ساری دنیا اک گلوبل گراں Global Village نی صورت بچ نیڑے نیڑے آگئی۔ ترقی نے سارے بوہے کُھلے۔ خود انحصاری توں بدھ کے عالمی معیشت اُپر انحصار کرنا شروع ہویا۔ بڑی تیزی نال Whats App، فیس بک Face book وائی فائی Wifi کائز Kies ٹویٹر Twitter یوٹیوب YouTube براؤزر browser اوپیرامنی Opera Mini انسٹا گرام Instagram جئے سوشل میڈیا وجود بچ آئے۔ اِنہاں نے ذریعے ساری دنیا نے لوک اک دوّے نال رابطے استوار کرنے بچ کۂٹ توں کۂٹ وقت بچ کامیاب ہوئی گئے۔ انہاں رابطیاں نے متے سارے فائدے تہ اتنے ہی نقصان وی ہوئے۔

ہر اک نکا بڑا اِتھاں سہولتاں نے ذریعے ہر قسم نا پروگرام تکنے تہ انہاں بچ شمولیت پیدا کرنے اُپر قدرت حاصل کر چکیا ہے۔ دنیا نے ہر خطے نی زبان، ثقافت تہ رہن سہن نال واقفیت حاصل کرنے بچ دِقّت نیۂہ محسوس ہوئی۔ گلاں نی ترسیل نا ذریعہ عجیب حد تکر آسان ہوئی گیا۔ گلوب نے اک حصے توں دُوئے حصے بچ پیغامات گلاں باتاں، تبصرے بحث و مباحثے تہ ہور دُوّے طریقے کار نے اک بڑی تبدیلی نے بشکار انساناں کی آنی کھلا کیتا۔ خط و کتابت نے طریقے بدلے۔ ہُن میل جول نیّاں سہولتاں آیاں۔ فاصلے کئٹے، وقت بچیا۔ جسمانی تھکاوٹ نے عذاب توں بچے، سفری ضرورتاں مختصر ہوئیاں۔ پر اِس طراں نیاں ساریاں سہولتاں نے سب توں زیادہ نقصان علاقائی زباناں کی ہویا۔ جتھے موجودہ انٹرنیٹ نیاں سہولتاں نے دماغی طور اُپر انساناں کی مصروف ترین حالت بچ چھوڑیا۔ اُسے انٹرنیٹ نے انگریزی آلے پاسے ہر اک نا رجحان موڑ دِتا۔ بقول ہک محقق فدا راجوروی نے:
”اس منظر نامے بچ ایہہ گل یاد رکھنی پیسی جے اک سروے نے مطابق دنیا نیاں بہتّر زباناں بلیں بلیں ختم ہورہیاں ہین۔ کجھ نزع نے عالم بچ ہین، کجھ مہلتی بخاراں بچ۔ روز بدلن آلے سیاسی منظر نامے، سیاسی جبر لسانی یلغار، عالمگیریت ہور گلوبل ولیج نے بے اصول تصور نال ایہہ بد حالی تہ تبدیلی ہر جگہ، ہر گراں ہر کۂر بجی ہے۔“
(شیرازہ پہاڑی :2014)

اس حوالے نال بحیثیت مجموعی سب علاقائی زباناں نے نال نال پہاڑی زبان اُپر وی زوال نیاں بدلیاں چھا کے اس نے آگے بڑھنے نے موقعے کہلنے جارہے ہین۔ اس طبقے نی زبوں حالی، بے روزگاری تہ مایوسی اپنی زبان آپ ہے۔ انگریزی زبان نی یلغار نے سامنے ساریاں زباناں بے بس ہوئی گئیاں ہین۔ ہر نکّا بڑا متبادل لفظاں نی موجودگی نے باوجود انگریزی نے لفظاں نال اپنے منہہ نا ذائقہ بدل رہیا ہے۔ آج پہاڑی بولنے آلے لوگ اپنی زبان بچ گل بات کرنے بچ شرم محسوس کرنے ہین۔ یہ لنگڑی جئی انگریزی نا سہارا لے کے گل کرنے بچ لطف محسوس کرنے ہین۔ آج نا پہاڑی نوجوان ہی نیہہ بلکہ گوجری ہور کشمیری بولنے آلے وی اساہڑے علاقے بچ انگریزی نے بودھے دستر خوان اُپروں ہڈیاں چبانے نا ذائقہ محسوس کر رہے ہین۔ آج نے سرکاری یا غیر سرکاری ادارے انگریزی نے حوالے نال زیادہ معروف تہ مشہور ہین بہ نسبت ہور ثقافتی تہ تہذیبی سرگرمیاں نے۔

زبان ہمیشہ روز گار نال جُڑی رہوے تہ اوہ زندہ رہ سکنی ہے۔ اس نے نال سرکار نی سر پرستی نے حوالے نال کجھ دہڑکسی پر اس نا عروج نیہہ نصیب ہونا۔ اک وقت پالی زبان نا چلن دریا گنگا توں لے کے دریائے کاشغر تک سی۔ مشہور شاردا پیٹھ بچ اس زبان نا چلن سی۔ پر حکومتی تبدیلیاں نے اس نے اثر کی سنسکرت تہ فِر ہور علاقائی زباناں نی ترقی مِلنے اُپر زائل کر دتا۔ آج پالی زبان اوپری لگنی ہے۔

اُردو زبان نا چلن بھی برصغیر بچ کۂٹ گیا ہے۔ اپنی جگہ علاقائی زباناں نا رواج چلیا۔ پر اس قول نے مطابق: ”کوا چلا ہنس کی چال، اپنی چال بھی بھول گیا۔“

انگریزی نی یلغار نے ہندی کی وی متاثر کیتا پر اردو زیادہ نشانے اُپر ریہئی ہے۔ اُردو نی جلا وطنی علاقائی زباناں نال ہوئی۔ پر علاقائی زباناں روزگار نال نیہہ جُڑ سکیاں۔ اس واسطے ”دھوبی کا کتا نہ گھر کا نہ گھاٹ کا“ آلی گل ہو گئی۔

اَج روزگار نا بوہا انگریزی نی کنجی نال کُھلنا ہے۔ اس واسطے موجودہ نسل اُس سونے نی کنجی نی کھوج بچ در بدر ہے۔ کارپوریٹ سیکٹر تہ عالمی منڈی بچ وی انہاں زباناں نا عمل دخل نیہہ۔ اس توں بدہیک ایہہ گل وی ہے کہ زبان نے حوالے نال جیہڑے اپنی ثقافت نال جوڑ نے سن اوہ اپنے طور طریقیاں تہ اپنی روایات توں دستبردار ہو چکے ہین۔ اس طراں کئی اک قسم نیاں دراڑاں ترقی نے مدان بچ حائل ہو گئیاں ہین۔

نئے دور نے تقاضے وی نویں ہوئی گئے۔ جس مقصد تہ جس ماحول بچ سیف الملوک نا تخلیقی سفر ہویا سی آج اسکی قائم رکھن نا کوئی دستور نظر نیہہ آنا۔ نہ اوہ ڈکشن نہ ہی اُسنا اسلوب کِسے نویں دور نے لکھاری کول آسکیا ہے۔

نویں دور نا چیلنج اتنا مشکل ہے کہ اس اُپر کجھ سوچنا ہی اپنی جگہ دشوار ہے۔ انگریزی ادب توں اُردو نے جدید ادب بچ چھال ماری پر جدید ادب اُپر نہ ٹھہریا گیا۔ فر نواں اسلوب لے کے مابعد جدیدیت (Post modernism ) تک سفر کیتا گیا۔ اس زمین اپر جہاں لفظاں نی کاشت ہوئی انہاں نے اضافی معنی کڑھنے اُپر جتن کیتے گئے نہ کہ لغت نے اعتبار نال معنی اخذ کیتے گئے۔ اس طراں اک ہور گورکھ تہندا پیدا ہویا جیہڑا علاقائی زباناں سمجھنے تہ برتنے نا حوصلہ نیہہ رکھنیاں۔

اسطراں ایہہ زباناں الیکڑانک میڈیا نے خول بچ بیچنے توں پہلاں دشوار گذار مرحلیاں بچ اٹکی کے کوئی آسان تہ عام فہم ذریعہ تلاش کر سن پر ماحول اس بچ کسے حد تک ساتھ نیہہ دے سکن لگا۔

ایہہ وی معاملہ توجہ طلب ہے کہ جیہڑا اسلوب انگریزی نے اُردو کی دتا، اس اُپر چرچے کیتے۔ اوہ ماحول اُردو یا ہور کسے حوالے نال پہاڑی زبان کی نہ مل سکسی۔ اساہڑی سوچ انگریزی توں اُدھاری پڑھائی اُردو نی ۔۔۔۔۔. تہ مادری زباناں کیہڑے چور دروازے بچوں اندر داخل ہوسی تہ اسکی اپنی اصلی شناخت مل پاسی؟

ایہہ گل بجا طور پر محسوس ہوئی ہے جے جس رفتار نال سوشل میڈیا آگے بدھ رہیا ہے اسے رفتار نال اساہڑیاں مادری زباناں متاثر ہو رہیاں ہین۔ ایسا وی ہو سکتا ہے جے علاقائی زبان خورے زیادہ آساں نا ساتھ نہ دیئی سکن تہ مستقبل بچ انہاں اُپر زوال آنا نظر آرہیا ہے۔ اسنی بڑی وجہ نویں نسل اپنے سارے تجربیاں نے باوجود زبان دانی نے حوالے نال کوری بنی ہوئی ہے۔ پُرانی نسل نے خاتمے توں بعد ایہہ زباناں اپنی موت مر جاسن تہ اس زوال اُپر کوئی اتھروں کڈھن آلا وی نیہہ مِلسی گا۔

تحریر

نثار راہی