Back to: ن سے شروع ہونے والی نعتیں
| نارِ دوزخ کو چمن کردے بہارِ عارض ظلمتِ حشر کو دن کردے نہارِ عارض |
| گرچہ قرآں ہے نہ قرآں کی برابر لیکن کچھ تو ہے جس پہ ہے وہ مدح نگارِ عارض |
| جیسے قرآن ہے وِرد اس گلِ محبوبی کا یوں ہی قرآں کا وظیفہ ہے وقارِ عارض |
| طور کیا عرش جلےدیکھ کے وہ جلوہء گرم آپ عارض ہو مگر آئینہ دارِ عارض |
| طرفہ عالم ہے وہ قرآن اِدھر دیکھیں اُدھر مصحفِ پاک ہو حیران بہارِ عارض |
| ترجمہ ہے یہ صفت کا وہ خود آئینہء ذات کیوں نہ مصحف سے زیادہ ہو وقارِ عارض |
| جلوہ فرمائیں رخِ دل کی سیاہی مٹ جائے صبح ہوجائے الہٰی شبِ تارِ عارض |
| نامِ حق پر کرے محبوب دل و جاں قربان حق کرے عرش سے تا فرش نثارِ عارض |
| مشک بُو زلف سے رخ چہرہ سے بالوں میں شعاع معجزہ ہے حلبِ زلف و تتارِ عارض |
| حق نے بخشا ہے کرم نذرِ گدایاں ہو قبول پیارے اک دل ہے وہ کرتے ہیں نثارِ عارض |
| آہ بے مایگیِ دل کہ رضائے محتاج لے کر اک جان چلا بہرِ نثارِ عارض |
