Back to: ہ سے شروع ہونے والی نعتیں
| ہم تمہارے ہوکے کس کے پاس جائیں صدقہ شہزادوں کا رحمت کیجیے |
| عالمِ علمِ دوعالم ہیں حضور آپ سے کیا عرضِ حاجت کیجیے |
| آپ سلطانِ جہاں ہم بے نوا یاد ہم کو وقتِ نعمت کیجیے |
| تجھ سے کیا کیا اے مِرے طیبہ کے چاند ظلمتِ غم کی شکایت کیجیے |
| دربدر کب تک پھریں خستہ خراب طیبہ میں مدفن عنایت کیجیے |
| ہر برس وہ قافلوں کی دھوم دھام آہ سنیے اور غفلت کیجیے |
| پھر پلٹ کر منہ نہ اُس جانب کیا سچ ہے اور دعوائے الفت کیجیے |
| اقربا حُبِّ وطن بے ہمتی آہ کس کس کی شکایت کیجیے |
| اب تو آقا منہ دکھانے کا نہیں کس طرح رفعِ ندامت کیجیے |
| اپنے ہاتھوں خود لٹا بیٹھے ہیں گھر کس پہ دعوائے بضاعت کیجیے |
| کس سے کہیے کیا کِیا کیا ہوگیا خود ہی اپنے پر ملامت کیجیے |
| عرض کا بھی اب تو مُنہ پڑتا نہیں کیا علاجِ دردِ فرقت کیجیے |
| اپنی اک میٹھی نظر کے شہد سے چارہء زہرِ مصیبت کیجیے |
| دے خدا ہمت کہ یہ جانِ حزیں آپ پر وارے ، وہ صورت کیجیے |
| آپ ہم سے بڑھ کر ہم پر مہرباں ہم کریں جرم آپ رحمت کیجیے |
| جو نہ بھولا ہم غریبوں کو رضا یاد اس کی اپنی عادت کیجیے |
